Kasama sa itinuturo ko ay ang Komunikasyon sa Filipino, karamihan ng aking mag-aaral ay malikhain/masining dahil ang strand nila ay Multimedia kaya gamit ang ASSURE tinitiyak kong magiging kaakit-akit ang pagbuo namin ng modelo sa klase upang mailabas rin nila ang kanilang mga talento. Ang pinakamalikhaing modelo ng komunikasyon ay inilalagay sa teacher’s desk.

Ilan lamang ito sa mga naitabi kong modelo bg komunkasyon na ginagamit sa aking klase sa asignaturang Komunikasyon sa Filipino.

Naiwanan ko sa klasrum ang modelo ni Frank Dance, Binuo ko iyon sa pamamagitan ng alambre na nakapulupot pataas na nangangahulugan na ang komunikasyon ay nagpapatuloy at hindi linyar.

Mahalaga na sa tulong ng mga modelo ay natutulungan natin ang ating mga mag-aaral na maunawaan ang paksa lalo na yung mga paksang may kahirapan sa konsepto at proseso.

Pumili na lamang ng tatlong pahina sa nabuong kong modyul na may 21 pahina. Ang imprinta nito ay ginamit sa aking klase sa asignaturang Filipino sa pribadong paaralan sa Makati. Makikita na binigyan pansin ko ang uri ng aking mag-aaral na lahat ay nasa strand ng Sining kaya kailangan maging makulay ang modyul na imprenta o maari i-download ng aking mag-aaral sa website ng aming paaralan. Binigyang konsiderasyon ko rin ang kasalukuyang pangyayari kaya ikinonteksto ko ito sa karanasan nila sa pandemyang COVID19, malinaw ko ring inilahad sa unahan ang layunin ng aming aralin, binigyan highlight rin ang mahalagang salita at pinaikli ang mahahabang talakay, simple lamang ang ginamit na mga salitang madaling intindihin ng babasa at sa dulo bilang gawain dahil sila ay may malaking interes sa Sining ay pinagawa ko ng Digital poster kalakip ang layunin ng pag-aaral na panghihikayat sa pamamagitan ng pagbubuo ng Poster/Islogan na naka-angkla pa rin sa pagkakaisa sa gitna ng pandemya. May mga binigay na gawain na makahihimok sa mga mag-aaral na mag-isip at hindi rin nakalimutan na ilagay ang pinaghanguan ng kaalaman/detalye sa aking ginawang modyul.

Masasabi kong nagustuhan ng mga mag–aaral ang aking modyul dahil nagbigay ng sarbey ang aming paaralan para sa mga mag-aaral kung mahusay ba ang modyul na ginawa ng mga guro at nakatutuwa naman na napakataas ang nakuha ng modyul na ito dala ang konseptong ASSURE ay maari ko itong ebisahin ng pauulit-ulit kung may kahinaang makita base sa nagiging sarbey ng mga mag-aaral

Nakatutuwang napapagana nating guro ang pagiging maalaman at malikhain sa pagbuo ng iba’t ibang kagamitan sa pagkatuto para sa kapakinabangan ng mga mag-aaral.

Paksang Aralin : Filipino sa Iba’t Ibang Disiplina Sining at Disenyo ( Wika sa Kulturang Popular)

Antas: Baitang 12

Haba ng Pagtalakay: 90 minuto

A- Analyze Learners Characteristic(Pag-aanalisa sa mga Mag-aaral)

• Ang mga mag-aaral ay binubuo ng 30 Senior Highschool baitang 12 sa IAcademy, na nasa strand na Multimedia Arts na Animation at Graphic Design. Lahat sila ay may malaking interes sa sining. 30% lamang sa kanila ang pangunahing wika ay Filipino at ang 70% sa mag-aaral ay Ingles ang pangunahing wika. Lahat ng mag-aaral ay nakatira sa Metro Manila kasama ang kani-kanilang mga pamilya. May 20% sa bilang ang kasama sa Upper Class ng lipunan , 50% naman ang nasa Upper Middle Class at 30% ang nasa lower Middle Class. Malaking porsyento sa mga mag-aaral ay may mga magulang na negosyante. Walang nakahiwalay na asignaturang Filipino para mga banyaga o hindi lumaki sa pagsasalita ng wikang Filipino sa paaralang ito

S- State Objective (Paglalahad ng layunin sa Pag-aaral)

Layunin:

1. Nauunawaan ang ginagampanan ng wika sa pagbuo ng kulturang popular
2. Naipamamalas ang kakayahan sa pagbuo/pag-akda ng kulturang popular sa mass media/social media
3. Naiuugnay ang ginagampanan ng bagong porma ng panitikan sa pagbuo ng kulturang popular.

S-Select,Modify or Design Materials ( Pagpili ng wastong estratehiya, midya at Kagamitan sa Pagtuturo)

• Ang kabuuang pagtalakay sa paksa ay malayang talakayan.Magbibigay ng Rebyu ang guro sa nakaraang-aralin sa pamamagitan ng KWL na chart, magkakaroon ng Pagganyak na gawain na tutuon sa paksa ito ay sa pamamagitan ng Paggamit ng Kahoot.com. Matapos nito ay magbibigay ng mahalagang katanungan ang guro sa pisara na tutuklasin ng mga mag-aaral ang kasagutan habang umuusad ang pagtalakay. Ang guro ang magpapakilala ng paksa at tatalakayin sa pamamagitan ng Powerpoint Presentation matapos nito ay magkakaroon ng tanong-sagot sa klase, magkakaroon ng maikling pagsasanay sa pamamagitan ng NEO LMS na ginagamit ng paaralan. magbibigay ng konklusyon at replektibong pagsasanay upang masagutan ang mahalagang tanong na ibinigay ng guro sa umpisa ng klase. Sa kahulihan ay magbibigay ang guro ng takdang-aralin. Magpagamit ng diksyunaryo o online dictionary sa mga mag-aaral na hirap sa wikang Filipino at laging handa ang guro sa pagsagot ng mga katanungan.

U-Utilize Media and Materials ( Paggamit ng midya at kagamitan)

-Sa pagbabalik-aral ay gagamit ng KWL chart, pasagutan lamang ang dalawang unang bahagi at hayaang magbahagi ang mga mag-aaral ng ilan sa kanilang sagot

-Sa pagganyak ay ipapakita sa powerpoint presentation o Google slide na paisa-isa ang mga icons ng social media, huhulaan ito ng mga mag-aaral sa paraang ito malalaman ng guro ang istatus ng kaalaman ng mga mag-aaral sa social media, lahat ng mag-aaral ay may social media

-Sa Pagtalakay ay iisa-isahin ng guro ang depenisyon ng kulturang popular, kakanyahan at mga uri nito, mga imahe at akdang makasining na nabubuo na ang ilan ay nagiging bahagi ng kulturang popular sa pamamagitan ng mass at social media. Magbibigay ang guro ng mga ispisipikong halimbawa. Ilalahad ito sa pamamagitan ng Powerpoint at Powtoon na inihanda.

-Sa Pagsasanay ay bubuo ng Tektula ang mga mag-aaral bilang bahagi ng kaalaman nila sa aralin i-post sa gamit ng LMS ng paaralan na NEO dito na rin mag-tsek ang guro. May mga tablet na abeylabol sa bawat klasrum kung nakalimutang magbitbit ng mag-aaral ng personal ng celfon.

-Ang replektibong Konklusyon patungkol sa Mahalagang tanong na ibinigay sa unahan ay ipapasok sa DISCUSSION THREAD sa NEO na itsurang Blog ang magiging porma

*Tandaan na maraming mag-aaral na hindi unang wika ang Filipino kaya binibigyang permiso ng guro ang paggamit ng diksyunaryo o online dictionary sa kanilang gadget, maging ang pagsagot ng mga konseptong hirap intindihin ng mga mag-aaral.

R-Require Learner Response (Pakikibahagi ng Mag-aaral)

• Sinisigurado ng guro na ang mga mag-aaral ay magiging malaya sa pagkikibahagi sa klase sa pamamagitan ng malayang talakayan at Tanong-sagot na istilo, malaking tulong ang Discussion sa loob ng NEO LMS upang makapagpahayag ng pasulat na pakikibahagi ang mga mag-aaral sa pagtalakay. Hahayaan ng guro ang ilang hiram na salita sa pakikibahagi ng mag-aaral sa pagtalakay dahil marami ang nanatiling nangangapa pa rin sa pagsasalita at pagsusulat ng wikang Filipino

E-Evaluate and Revise (Ebalwasyon at Pagrebisa)

-Napakahirap maging perpekto ang isang talakayan kahit matagal ng guro ay may mga kahinaan pa ring maaring matagpuan. Sa ganito ay maaring gumamit ang guro ng personal recorder ng kanyang paraan ng patlakay sa araw na iyon maari ring gamitin ang mentimeter.com upang malaman ang opinyon ng mag-aaral kung naging mabunga ang naganap na pagtalakay sa araw na iyon.

Nabanggit ni Romiszowski (1997) na mga aspetong nakaiimpluwensya sa pamimili ng kagamitang pampagtuturo una ang layunin sa aralin, sumunod ang uri ng mag-aaral at ikatlo kung abeylabol ang paghahanguan. Bilang isang guro naisip ko na maraming pagkakataon na naging makasarili sa ilang mga aktibidad na pinagawa sa mga dating naging mag-aaral. Una kasi sa akin ang pagtugma ng layunin at inaasahang resulta sa pipiliin kong kagamitang pampagtuturo ngunit minsan nakalilimutan ko ang dalawang aspeto na binanggit ni Romizowki. Madalas kasi akong magpaggamit ng mga gadget at iba pang elektronikong kagamitan bilang bahagi ng aking pagtuturo, sa paraang ito ay nakikita ko na nagiging handa ang aking mga mag-aaral hindi lang sa aking liksyon kundi sa kaalamang teknikal. Kasalukuyan akong nagtuturo sa kolehiyo na napakamakabago sa larangan ng teknolohiya at suportado ang mga guro sa iba pang kagamitang pampagtuturo kaya malaya ako na makagamit ng mga ito, kaya kapag may mag-aaral na nagsabi sa akin “Mam wala po ako access sa MS application” “Mam hindi po ako marunong ng GoogleDrive” ” Mam wala po kasi kami ganyan sa probinsya” Hindi ako makapaniwala at sa tingin ko ay gumagawa lamang sila ng dahilan upang hindi makasumite ng mga pangangailangan sa kurso.

Matapos ko basahin ang liksyon sa ating aralin namulat ako na tama nga ang edukasyon ay para sa lahat may gadget man sya o hindi man alam ng mag-aaral ang teknolohiya bilang guro tayo ang nararapat umisip ng paraan upang makasali sya sa pag-alam at pagtuklas ng bagong karunungan. Naalala ko bigla noong ako ay nag-aaral sa UP Diliman sa aking batsilyer na kurso, panahon na nawalan ng trabaho ang aking ama sa kompanya sabi ng propesor ko ay kailangan namin magpresenta ng powerpoint bilang pagtugon sa takdang-aralin, wala akong pambayad sa computershop kaya ang ginagawa ko lahat ng detalye ay hinahanap ko sa aklatan. Imbis na powerpoint ay mga lumang Manila paper ang gamit ko, yung likod ang sinusulatan ko, imbis na magbigay ako ng handouts na printed at compuuterized sa mga kaklase at guro ko ay tyinaga kong isulat sa malinis na papel at ipa-photocopy na lamang ng marami upang makatipid. Pamasahe lang kasi ang dala ko noon. Dahil sa aralin nating ito bumalik sa aking alaala ang lahat ng ito. Mahirap maging mahirap lalo kapag nag-aaral ka at inaamin kong nakalilimutan ko ito ngayong guro na ako.

Sana sa ngayong isyu ng distant learning ay hindi malimutan ng mga namumuno sa DEPED ang konsiderasyon sa mga mag-aaral na walang access sa mga kagamitang pagkatuto. Isama natin sila, isa para sa lahat, lahat para sa isa. Sabay-sabay na pagkatuto, Ito ay karapatan ng bawat isa.

            

            

            

Puno ng pangamba at alinlangan ang gmga magulang, estudyante at maging ang mga ibang guro sa darating na apsukan sa Agosto, hindi maikakaila na maraming bumabatikos sa DEPED sa pagsusulong na buksan ang klase sa darating na Agosto. Sabi nga ni Congressman Gatchalian”Handa na ba? kundi handa ay huwag ituloy”. Matatandaan na aprubado ng Pangulong Duterte ang pagpapatuloy ng klase na hindi face to face learning. Kaya malaking hamon ito sa DEPED na masiguradong wasto ang tatahakin ng edukasyon ngayong taon.

Mabuti na naisaayos at nairebisa ng DEPED ang kurikulum at naiwan na lamang ang pinakamahahalagang layunin at Kompetensi sa kurikulum bilang guro nagustuhan ko ito dahil mas pinasimple and dating komplikadong mga kompetensi, mas kaunti ang paksa at mas madaling matapos na hindi gugumol ng malaking oras. Dahil mas kaunti ang kompetensi at paksa ay mas makakapagpokus ang guro sa pagbuo ng modyul at magbuo ng mga kagamitang pagtuturo. Mas mabibigyan ng panahon ang mga gurong maghanap ng relayable/maasahan at mga wastong impormasyon na makikita sa internet at makagawa ng modyul para sa mga mag-aaral na walang internet o gadget sa bahay.

Kung may nararapat na tanungin ng”handa ka na ba?”ay ang mga guro, napakarami ng nakaatang na responsibilidad ngayon ng bawat guro. Isipin natin na ang isang gurong pampubliko ay hahawak ng 300-400 na mag-aaral sa regular na klase ganun rin ang dami ng tuturuan nila sa distance learning? Ako bigla ako napaisip kung kakayanin ko dahil sa kasalukuyan ay may aplikasyon ako sa pampublikong paaralan at naghihintay na lamang ng pagpapasa ng mga requirements. Kaya ko bang magturo online kasabay ng pagbibigay ko ng modyuls sa bawat bahay ng mga mag-aaral kapag ang magulang ay hindi kayang gabayan sa pag-aaral ng kanilang anak ayon sa DEPED guro ang mag-tutor sa bata, sa dami ng mga mag-aaral na iikutan ng guro makakaya kaya ito? Sa totoo lang bigla ako napaisip kung handa na ba ako? mukhang hindi pa lalo na ay tila inaatang na lamang ng DEPED sa mga guro ang buong responsibilidad. Kahit may malaking pagmamahal sa pagtuturo ay tao rin naman ang mga guro na napapagod ang katawan. Sana ay mabigyan ng wastong kalinga rin ang mga guro na mula sa gobyerno.

Ang guro ay nararapat maalam sa asignaturang kanyang itinuturo ngunit sa panahon ngayon hindi na lamang sasapat iyan kundi nararapat na maging maalam at malikhain ang giro sa pag-iisip kung paano niya maipapahayag at matuturuan ang kanyang mga mag-aaral sa pinakamabisang paraan lalo na sa henerasyon ngayon na ang mga bata ay halos ipinanganak na katabi ang mga gadget sa kanilang mga katawan. Sa ganitong sitwasyon ang matalinong guro ay nararapat mag-isip ng istratehiya kung paano mas magiging praktikal ang pagtuturo- pagkatuto ng mga mag-aaral na hindi nalalayo sa kanilang karanasan sa henerasyon. Sa panahon ngayon nararapat na bang baliwalain ang mga tradisyunal na kagamitan sa pagtuturo?

Natutunan ko sa liksyon na hindi usapin ng tradisyunal o makabagong midyum ito ng pagtuturo. Tradisyunal man o makabago ay nararapat isipin ng matalinong guro kung paano ito magagamit sa wasto at epektibong paraan na nakasalalay sa layunin ng pagkatuto sa asignatura. Alalahanin na ang mga kagamitang pampagtuturo ay paraan/istratehiya lamang upang mapadali ang pagkakaunawa sa liksyon ngunit ang magiging gabay pa rin tungo sa layuning pagkatuto ay ang guro na hindi mapapalitan ng kahit anumang kagamitan(naka-print, audio, viswal atpb.)

Ang pagiging guro ay walang limitasyon kung anumang materyales ang nararapat nyang gamitin. gagamitin nya ang anumang kagamitan na makatutulong sa kanyang makakonekta sa kanyang mga mag-aaral. Tsalk man o paggamit ng Google slides. Inaalaman ng guro ang uri ng mga mag-aaral sa pamamagitan nito makapipili sya ng pinakaangkop na kagamitan sa pampagtuturo. Halimbawa, kung ang mga mag-aaral mo ay hindi pa gaanong gamay ang paggamit ng padlet.com ay hindi ito maaring ipilit bagkus maaring gumamit na muna ng panulat at papel.

Kaya kasama sa pagiging guro ang pagpapa-unlad ng kaalaman sa iba’t ibang uri ng kagamitan sa pagkatuto upang maraming mapagpiliian at maging opsyon.

Malaki ang ginagampanan ng kagamitang pagkatuto upang maging epektibo ang pagtuturo ng mga guro at pagkatuto ng mga estudyante. Mahalagang pinaplano ng guro kung paano niya magagamit sa pinakamabisang paraan ang mga kagamitang ito. Mahalaga ring siguraduhin ang layunin ng paksa at kurikulum, inaasahang resulta, mag-isip ng istratehiya kung paano ito maituturo at isipin kung anong kagamitan ang maaring gamitin.

Sa paksa natin sa asignaturang ito ay binigyang diin ng napakaraming instruksyunal na kagamitan na maaring gamitin tulad ng naka-print, grapiko, audio, mga larawan, telebisyon, video, internet, kompyuter at iba pa. Maraming Pilipinong guro ang inobatibo sa paraan ng kanilang pagtuturo at nahahabi ng husto ang pagkatuto ng mag-aaral gamit. Nararapat na kilala ng guro ang pangangailangan ng kanyang mga mag-aaral o kung anong uri ng mag-aaral ang mga ito, sa panahon natin ngayon maraming mga mag-aaral ang yumayakap sa teknolohiya kaya mabisa itong gamitin upang makuha ang atensyon, makatipid ng oras at mas maintindihan ang mahihirap na konsepto sa aralin.

Sa aking danas bilang guro, lagi kong iniisip ano ba ang uso ngayon? ano ba yung pamamaraan na mas maiintindihan ako ng henerasyon ng aking mga mag-aaral kaya hindi lamang tayo magpatali sa isa , dalawa o tatlong instruksyunal na kagamitan kundi maging malikhain sa pag-iisip kung paano ang mga kagamitan ito ay makatutulong upang makamit ang inaasahang resulta sa kaalaman ng ating mga mag-aaral.

Dapat alalahanin na bilang guro ay may higit tayong responsibilidad sa ating mga mag-aaral na sila ay matuto at mahasa ang kaalaman. Nararapat maging inobatibong guro sa lahat ng oras.